Category: Startup

MStars Hub-ийн анхны төгсөгчдийн нэг, барилгын салбарын хүний нөөц, захиалагч нарыг холбосон  “Артум” стартап нь  мэдээллийн технологийн салбарын тэргүүлэгчдийн нэг “Аствишн”  компаниас хөрөнгө оруулалт авлаа.

Тус хөрөнгө оруулалтыг авснаар “Артум”-ын систем хөгжүүлэлт дараагийн шатандаа гарч, дагаад Монголын барилгын салбар дахь дижитал шилжилт эрчимжин, хэрэглэгчдэд тулгамддаг олон асуудал шийдэгдэх боломжтой юм.

“Артум” компанийн үүсгэн байгуулагч Д.Санжсүрэн: “Бид байгуулагдсан цагаасаа хойш барилгын захиалагч болон гүйцэтгэгч нарт бүтээгдэхүүн, үйлчилгээгээ хүргэж, энэ салбартаа танигдан, олон тооны ажлыг амжилттай гүйцэтгээд байна. “Аствишн” компаниас хөрөнгө оруулалт авснаар өөрсдийн технологийг хэрэглэгч төвтэй, боловсронгуй аппликейшн болгон хөгжүүлж, барилгын салбарыг илүү бүтээмжтэй, илүү хялбар болгох юм.”

“Аствишн” компанийн үүсгэн байгуулагч, CEO О.Энхмөнх: “Айл өрх, албан байгууллагын анхдагч хэрэгцээнүүдийн нэг болсон барилгын үйлчилгээний салбарт цахим шилжилт хийх шаардлага тулгараад байгаа. Энэ асуудлыг шийдэхээр зорьж яваа, өсөх ирээдүйтэй энтрепренер залуусын алсын хараанд нэгдээд, хамтран ажиллахаар шийдсэн гэж хэлж болно.”

Ийнхүү MStars Hub-ийн тавдах стартап хөрөнгө оруулалт авснаар, анхны 11 төгсөгчийн 50-иас илүү хувь нь хөрөнгө оруулалт авч чадлаа. “MStars Hub нь энжел болон VC гэх мэт бүх төрлийн хөрөнгө оруулагчидтай нээлттэй хамтран ажилладаг бөгөөд цаашид хүрээгээ улам тэлсээр байх болно” хэмээн MStars Hub-ийн Гүйцэтгэх захирал Ч.Даваажамц хэллээ.

 

Гайхалтай санаанаас агуу руу хөтлөх хөшүүрэг нь стартапын хувьд хамгийн түрүүнд хөрөнгө оруулалт байдаг. Тийм ч учраас хөрөнгө оруулалтын төрлүүд хэрхэн ажилладаг, юугаараа хоорондоо ялгаатай талаар мэдээлэл хүргэхээр бэлтгэлээ.

Pre Seed Funding                                                                                                                                                                                                                                                                      Үүсгэн байгуулагчид бизнес төлөвлөгөөгөө боловсруулах, шинж чанараа тодорхойлох үе буюу байгууллагын хамгийн эхний үе шатанд шаардагдах хөрөнгө. Ихэвчлэн Pre Seed Funding-г үүсгэн байгуулагчид өөрсдөө хийдэг.

Seed funding                                                                                                                                                                                                                                                                                 Seed хөрөнгө оруулалтыг мод тарихтай зүйрлэж болно. Seed хөрөнгө оруулалт нь албан ёсны санхүүжүүлэлтийн хамгийн эхний шат ба дөнгөж үйл ажиллагаагаа эхэлж байгаа бизнест оруулах хөрөнгө оруулалт юм. Олон бизнесүүд дараагийн түвшний Series A болон дараа дараагийн хөрөнгө оруулалтыг авч чаддаггүй.

Series A funding                                                                                                                                                                                                                                                                      Series A хөрөнгө оруулалт нь зах зээлд өөрийн гэсэн байр суурьтай, тодорхой хэмжээний орлоготой, тодорхой тооны үйлчлүүлэгчтэй болсон бизнесүүдэд бүтээгдэхүүн сайжруулалт хийх, өргөжихөд туслах зорилгоор хийдэг хөрөнгө оруулалт юм.

Хөрөнгө оруулагчид Series A Funding хүсэж байгаа бизнесүүдээс гайхалтай санаанаас гадна амжилтанд хүргэх, байгууллагын цар хүрээг тэлж чадах зөв стратегийг чухалчилж хардаг байна.

Series B funding                                                                                                                                                                                                                                                          Series B хөрөнгө оруулалт хүсэж буй бизнесүүд нь нэгэнт өөрсдийгөө хөрөнгө оруулагчдад баталсан байгууллагууд байдаг. Тэдгээр дараагийн түвшинд үйл ажиллагаа явуулахад бэлэн хэрэглэгчийн тоо, ашиг, орлого нь тогтмол нэмэгдсээр байгаа байгууллагуудад үйл ажиллагаагаа улам тэлэхэд нь туслах зорилготой хөрөнгө оруулалтыг Series B Funding гэнэ.

Series C funding                                                                                                                                                                                                                                                            Уг хөрөнгө оруулалтыг шинэ бүтээгдэхүүн хөгжүүлэх, өөр компани худалдан авч цар хүрээгээ тэлэх, гадны зах зээл рүү нэвтрэхээр бэлтгэж буй компаниуд авдаг.

 

Та өөрийн бизнесээ эхлүүлэх, амжилттай удирдах талаар олон ном уншиж, подкаст сонссон ч байж болох ч доорх олон ангит кинонууд “аяллаа” үргэлжлүүлэхэд тань гарын авлага болох болно.  Сүүлийн жилүүдэд стартап, энтрепренершипийн эргэн тойронд олон алдартай телевизийн бүтээл төрсөн ч, Монголын залуу бизнес эрхлэгчдэд илүү тохирох цувралуудыг толилуулж байна.

1. “Start-Uр”

Солонгосын “Start-Uр” цуврал нь гарсан даруйдаа “хит” болж, барууны стартапын ертөнцийг гайхашруулсан юм. Тус цувралд стартапын хурдасгуур хөтөлбөр, венчур сан, энжел хөрөнгө оруулагчид болон технологийн стартапыг амжилтад хүргэх үүсгэн байгуулагчдын тухай энийн ойлгомжтой боловч яг байгаагаар нь харуулж чаджээ.

Тус цувралын 16 анги тус бүр нь танд нэг хичээл болох бөгөөд хүн бүр гүйцэтгэх захирал болж чаддаггүйг, ментор хүн хэрхэн тусалж чадахыг, үүсгэн байгуулагчдын мөрөөдөл яаж алсын харааг тодорхойлж буйг эндээс үзээрэй. Мэдээж залуусын хайр сэтгэлгүйгээр Солонгос олон ангит киног төсөөлж болохгүй шүү.

2. “Silicon Valley”

Технологийн стартап эхлүүлж байгаа бол гарцаагүй таны үзэх ёстой цувралын нэг.  Дэлхийн номер 1 стартапын экосистем болох Цахиурын хөндийтэй танилцаж, тэнд амьд үлдэхээр тэмцэж буй програмист, код хөгжүүлэгчдийн амьдралыг бодитоор мэдрэх болно. Гэхдээ инээд хөөртэй, хөгжилтэйгээр …

Уг цувралыг үзсэнээр та сайн санааг ашигтай бизнес болгон хувиргах, хэлэлцээ хийх ур чадвар эзэмших нь хэчнээн чухал болох мөн түүнчлэн дэмжлэг үзүүлэх сүлжээнд нэгдэх нь ямар чухал гэдгийг ухаарах болно.

3. “StartUр”

“StartUp” бол асар их шунал болон шинэ крипто валютын ачаар нийт хоорондоо салшгүй холбоотой болсон дөрвөн хүний түүхийг өгүүлдэг. Иззи Моралес хэмээх залуу GenCoin криптовалютыг өөрчлөхийг хүссэн ч хөрөнгө оруулагчаас бохир мөнгө авснаар бүх ээдрээ эхэлдэг.

“StartUр” цуврал 2016 онд крипто валютын талаар анхлан зарлаж байсан бол өдгөө 2021 онд хэрхэн дэлхий ертөнцийг өөрчилж байгааг бид бэлхнээ харж байгаа. Тиймээс заавал үзэх ёстой цуврал байгаа биз.

4. “TVF Pitchers”

2015 онд олны хүртээл бол уг цуврал Энэтхэгийн стартапын ертөнцийн нүүр хуудас болжээ.  Энэ бүтээл нь зөвхөн стартапаа амжилтад хүргэх тухай бус хүмүүсийн хүсэл тэмүүлэл, мөрөөдлийг тусгасан байна.  Технологийн салбарт хүч сорьж буй залуусын өмнө тулгарч буй саад бэрхшээлүүд, уналт босолт, үзэн ядалт урвалт гээд бүгдийг үнэнээр нь өгүүлдэг. Тийм ч учраас тус цуврал танд сургамж болно.

Хамгийн түрүүнд “баг” гэдэг сайн санаа, их хэмжээний хөрөнгө оруулалтаас ч илүү чухал гэдгийг ухаарах болно.

5. “Billions”

Энтрепренерүүдээ! Тэрбумтан болохыг хүсэж байгаа бол “Billions” цувралыг л үзэх хэрэгтэй.  Энэхүү олон ангитад хөрөнгийн зах зээл, арилжаа, хөрөнгө оруулалт, сангууд гээд санхүүгийн зах зээл болон түүний оролцогчдын тухай илэн далангүй өгүүлнэ.

Үзэж дууссаны дараа та тэрбумтан болохын тулд ихээхэн золиос шаардлагатай гэдгийг, санхүүгийн зах зээлийг хамгийн баян оролцогчид болон улс төрийн нөлөөлөл хэрхэн удирддаг болохыг ойлгож авна.

Хатуу боловч чухам үнэнийг өгүүлэхэд “Цахиурын хөндий”-д үүсэн байгуулагдсан 10 стартапын 9 нь бүтэлгүйтэж уналтад ордог байна.  Шалтгааныг нь тодруулахаар ажилласан судлаачдын багийнхан дампуурлын шалтгаан нь хэзээ ч ганцхан асуудлаас үүдэн гардаггүй, хэд хэд хүчин зүйлс хавсран нөлөөлдөг болохыг тогтоожээ. Ингээд топ шалтгаануудыг олж илрүүлцгээе.

1. Зах зээлийн эрэлт байхгүй

Стартапуудын бүтэлгүйтлийн шалтгааны 40 хувь нь бүтээгдэхүүн, үйлчилгээ нь зах зээлийн эрэлт байхгүйгээс болдог байна. Стартапууд зах зээлийн эрэлт хэрэгцээнд нийцэхээс илүүтэй сонирхолтой, шинэ асуудлыг шийдвэрлэх гэх нь анхнаасаа буруугаар эргэдэг.

2. Бизнесийн загвар байхгүй

“Стартап гэж бизнесийн загвараа эрж, хайж байгаа байгууллагыг хэлнэ” гэсэн тодорхойлолт хүртэл бий. Тиймээс ганц гайхалтай санаатай байх нь хангалтгүй. Олон стартапууд санаа эсвэл бүтээгдэхүүнээ санал болгодог ч түүнийг дэмжих бизнесийн загваргүй байдаг.  “Lean Canvas”  хэмээх бизнес загварчлалыг ашиглан асуудлаа шийдэхийг санал болгож байна.

3. Мөнгө дууссан

Ямар ч компани үйл ажиллагаа явуулж, оршин тогтноход мөнгө шаардлагатай. Ихэнх стартапууд эхний үе шатанд ашиг олох магадлал багатай бөгөөд өөрсдийнх оруулсан хөрөнгө оруулалт удалгүй дуусчихдаг. Компани ашиг олж эхэлтэл, үүсгэн байгуулагчид зайлшгүй зүйлд мөнгөө зарцуулж, бусдыг нь хэмнэх хэрэгтэй. Мөн таны стартап өсөлт хийхэд хэрэгтэй дараагийн шатны хөрөнгө оруулалтад яг одооноос бэлтгэж эхлэх нь зүйтэй.

4. Багаа зөв бүрдүүлээгүй

Ялгаатай ур чадвар, авьяастай хүмүүсээр багаа бүрдүүлэх нь хамгийн чухал нөөц юм. Гэтэл үүсгэн байгуулагчид бүхнийг дангаараа хийх гэж зүтгэх, компанидаа шаардлагатай мэргэжилтнүүдийг цалинжуулж ажиллуулахаас татгалзах нь бүтэлгүйтлийн бас нэг шалтгаан болдог.

5. Өрсөлдөөнийг үл тоох

Стартапууд өөрсдийгөө анхдаг гэдэгт бардан өрсөлдөөнийг анхаарч үзэхгүй байх нь тэднийг өрсөлдөөний стратегидаа хайхрамжгүй хандах, араасаа олон өрсөлдөгчийг дагуулж, ялгарч чадахаа болиход хүргэсэн байна. Өрсөлдөөнд хэт автах нь тийм ч зөв биш боловч тэднийг үл тоомсорлох нь бүтэлгүйтлийн 19 хувиар нэмэгдүүлж байсан юм.